Նկարիչ–դիզայներ, արվեստաբան Տաթեւ Պետրոսյանը դեռ ուսանողական տարիներից ստեղծագործել է։ 13 տարի առաջ սկսեց բուռն գործունեություն ծավալել։ Այդ ժամանակ նաև ստեղծեց «TatevArt» ֆեսբուքյան էջը, որի միջոցով հանրայնացնում է իր աշխատանքները։ Տաթևը Ranking.am-ին պատմել է իր կատարած աշխատաքների, սեր տարածելու և հոգևոր կապի մասին:
Տաթև ի՞նչ մասնագիտություն ունեք:
-Առաջին մասնագիտությամբ նկարիչ֊դիզայներ, իսկ երկրորդ մասնագիտությամբ` արվեստաբան։
Ինչպե՞ս գտաք Ձեր նկարչության ոգեշնչումը:
-Դեռ փոքր տարիքից սիրել եմ նկարել, ոգեշնչվել եմ հայկական մանրանկարչությամբ։
Ըստ Ձեզ նկարչուհու աշխատանքում ո՞րն է ամենակարևորը:
-Յուրաքանչյուր աշխատանքում հաջողության հասնելու բանալին սեր և հոգի ներդնելն է։
Արդյո՞ք հեշտ եք բաժանվում Ձեր նկարներից:
-Աշխատանքներիս մեծ մասը սրբապատկերներ են, որոնք ընծայվում են եկեղեցիներին կամ որևէ հավատացյալի։ Գործը սկսելուց առաջ աղոթում եմ պատվիրատուի, նվեր ստացողի և Տիրոջ կողմից ինձ տրված շնորհի համար։ Այդ իսկ պատճառով որևէ դժվարություն չեմ զգում աշխատանքներիցս բաժանվելուց։
Ինչպե՞ս ստեղծվեց «TatevArt»-ը
-«TatevArt»֊ը ստեղծելու նպատակը ոչ միայն աշխատանքներս ներկայացնելն էր, այլ նաև հոգևոր, ազգային և մշակութային տեղեկություններ հաղորդելը։
Կարո՞ղ եք ներկայացնել Ձեր գործունեությունը:
-Էջի միջոցով փորձում եմ հետևորդներին ծանոթացնել սրբերի վարքին, նրանց զորավոր աղոթքներին և եկեղեցական տոներին։
Ինչպե՞ս կբնութագրեք մեկ բառով «TatevArt»-ը:
-Մեկ բառով կդժվարանամ, բայց երևի թե «իմ ստեղծագործական աշխարհ»:
Ի՞նչ աշխատանքերով և ոճով եք հանդես գալիս:
-Հիմնականում նկարում եմ սրբապատկերներ, մանրանկարներ, պատրաստում եմ եկեղեցական պարագաներ` սուրբ սեղանի ծածկոցներ, խաչի թաշկինակներ, շուշպաներ, խաչվառներ, գլխաշորեր և այլն…
Ինչո՞ւ որոշեցիք հենց հոգևոր պատկերներ նկարել:
-Կարծում եմ դա ոչ թե իմ որոշումն էր, այլ ինձ տրված շնորհի կանչը։
Տաթև, կա՞ Ձեզ մոտ արդյոք ոճային փոփոխության մտադրություն և ինչու:
-Մարդ որքան օգտագործում է իր շնորհները, Աստված էլ ավելիով բազմապատկում է դրանք։ Գուցե ստեղծագործեմ այլ ոճով, բայց սրբանկարչությունն ու մանրանկարչությունը իմ արվեստի անկյունաքարն են։
Տաթև ի՞նչը Ձեզ տարավ դեպի «եկեղեցական կյանք»:
–Աստծո նկատմամբ սերը, հավատքը և քրիստոնեական դաստիարակություն ստանալու փափագը։
Ի՞նչ ուղերձ ունեք մարդկանց Ձեր կատարած աշխատանքով:
-Ամեն ինչում ապավինել Աստծուն, աղոթել, խնդրել Տիրամոր և սրբերի բարեխոսությունը։
Հարցազրուցավար՝ Մարիամ Ավետիսյան
Լուսանկարները՝ Տաթեւ Պետրոսյանի անձնական արխիվից