Հարության խորհուրդը քրիստոնյան կյանքի անկյունաքարն է. Տեր Դավիթ Գիշյան


2

Այսօր` ապրիլի 9-ին, Հայ Առաքելական եկեղեցին նշում է եկեղեցական Տաղավար տոներից մեկը` Սուրբ Զատիկը:  Տեր Դավիթ Գիշյանի հետ խոսել ենք Հարության տոնի և ավանդույթների մասին:

  1. 1

    Hrayr Dallakyan
    5

    Տեր հայր, մի փոքր ներկայացրեք Սուրբ Հարության տոնը:

    Սուրբ Հարության տոնը տարվա կարևորագույն իրադարձությունն է, քանզի Քրիստոսի Հարության խորհուրդը քրիստոնեական կյանքի անկյունաքարն է։ Ամեն տարի մենք հիշատակում ենք աշխարհ եկած Փրկչի մեր համար կրած չարչարանքները, խաչելությունը, մահը և Հարությունը, և եկեղեցում կատարվող հատուկ ծիսակարգերի միջոցով հաղորդակից և մասնակից ենք լինում այդ խորախորհուրդ իրադարձություններին։


    Ի՞նչ է նշանակում Զատիկ:

    "Զատիկ" նշանակում է ազատագրում։ Զատիկը մինչ Աստծո Որդու աշխարհ գալը նշվում էր Իսրայելի եգիպտական ստրկությունից ազատագրման և անդրանիկների մահվանից փրկվելու հիշատակին, իսկ Նոր Ուխտի Զատիկը կրում է մեղքի ծառայությունից ազատվելու և Քրիստոսի Հարությամբ հավիտենական մահվանից փրկվելու խորհուրդը։

    Ինչպե՞ս պետք է այսօր մարդիկ իրար դիմեն:

    Հարության տոնին հաջորդող 40 օրերի ընթացքում քրիստոնյաները իրար ողջունում են ասելով " Քրիստոս հարյավ ի մեռելոց" ինչին ի պատասխան ասում են "Օրհնյալ է Հարությունը Քրիստոսի": Դրանով վկայելով մեր հավատքը և կիսվելու Հարության ուրախությունը միմյանց հետ:


    Տեր հայր ինչո՞ւ ենք միմյանց ձու նվիրում, և ինչո՞ւ ենք այն կարմիր գույնով ներկում:

    Այս սովորությունը դարերի խորքից է եկել և ունի իր սիմվոլիկ նշանակությունը։ Ձուն խորհրդանշում է աշխարհը իսկ կարմիր գույնը Քրիստոսի արյունը որով նա Խաչի վրա փրկագնել է ամբողջ մարդկությանը։

    Սեղանին ի՞նչ պետք է մատուցվի։

    Ավանդաբար մատուցվում են ձուկ, ներկած ձու, տապակած բանջար, բրնձով և չամիչով  փլավ, ինչպես նաև կարմիր գինի։ Ամեն մի ուտեստ ունի իր խորհրդանշական իմաստը։

    Ի՞նչ խորհուրդ ունի մատուցվող գինին:

    Գինին մատուցվում է ի նշան Քրիստոսի արյամբ կնքված Նոր Ուխտի, ինչպես կարդում ենք Ավետարանում "Ապա բաժակ վերցնելով՝ գոհացավ, տվեց նրանց՝ ասելով. «Խմե՛ք դրանից ամենքդ, որովհետև դա է նոր ուխտի իմ արյունը, որ շատերի համար թափվում է մեղքերի թողության համար։

    (ՄԱՏԹԵՈՍ 26:27‭-‬28)

    Տեր հայր Ձեր ընտանիքում  ինչպե՞ս եք նշում Սուրբ Հարության տոնը:

    Հարության տոնին սովորաբար պատրաստվում ենք Մեծ Պահքի հոգևոր ճամփորդությամբ, առանց որի Հարության ուրախությունը լիարժեք չի զգացվում։ Ապա Ճրագալույցի Սբ. Պատարագից հետո երեկոյան նավակատիքի ընտանեկան ընթրիք ենք անում և Կիրակի Սբ. Պատարագից հետո նշում ենք Զատիկը` հարազատների հետ ուրախակից լինելով Աստծո սիրո պարգևին որով Նա նոր կյանքի լիություն շնորհեց բոլորիս։

    Տեր հայր, կխնդրեմ Ձեր օրհնության խոսքը Հարության տոնի առթիվ։

    Զատկական այս ուրախալի օրերին աղոթաբար մաղթում եմ բոլորիդ Սուրբ Հարության շնորհներով  նորոգել ձեր սերը, հարություն տալ հոգևոր այն լուսավոր շնորհներին, որոնք կորցրել ենք մեղքի պատճառով և ազատագրվել չար սովորություններից` մաքուր սրտով և հոգու ջինջ բերկրությամբ տոնելու Տիրոջ Զատիկը։

    Հարցազրուցավար՝ Մարիամ Ավետիսյան